UPA 2002/15

 

Raajanut akitsuutit pillugit Inatsisartut inatsisaata allanngortinneqarneranik

Inatsisartut inatsisaannut siunnersuummut

 

allannguutissatut siunnersuut

 

Inuit Ataqatigiit Inatsisartuni qinigaatitaannit saqqummiunneqartoq.

 

§ 1-imut

1. Nr. 2 ima oqaasertaqassaaq:
"2. § 15, imm. 2-mi oqaaseqatigiit pingajuattut ilanngunneqassaaq:
"Aalisarnikkut ajornartoortoqartillugu imm. 1 naapertorlugu tamakkiisumik ilaannakuusumilluunniit isumakkeerinninissamut tunngavissaqartoqaraangat naatsorsuutitigut uppernarsaatissat pissarsiarineqarnissaat Naalakkersuisunit utaqqineqaraangat akitsuutip tamarmiusup taassumaluunniit ilaata akilinngikkallarneqarnissaa Naalakkersuisut akuersissutigisinnaavaat."

 

Oqaaseqaatit nalinginnaasut

Naalakkersuisut siunnersuutigaat raajanut akitsuutit 3%-miit 1%-mut appartinneqassasut avataasiorluni aalisarnermi nunarsuarmi tunitsivinni raajat qalipallit akii appasissut ajornartorsiortitsisuulersimasut innersuussutigalugit. Umiarsuaatileqatigiiffiilli pineqartut naatsorsuutaat suli saqqummiunneqarsimanngimmata, raajanut akitsuutit appartinneqarnissaat umiarsuaatileqatigiiffiit aningaasaqarnikkut inissisimanerisa pisariaqalersissimaneraat uppernarsaatissaqartinneqanngilaq.

Umiarsuaatileqatigiiffiit naatsorsuutaasa pissarsiarineqarnissaasa tungaannut umiarsuaatileqatigiiffiit pineqartut raajanut akitsuutinik akiliinngikkallarnissaannik (imaluunniit tamatuma ilaanik, assersuutigalugu 2 procentpointimik) Naalakkersuisut akuersissutiginninnissaannut allannguutissatut siunnersuut manna ajornarunnaarsitsivoq. Tamatuma kingorna Inatsisartut inatsisaanni § 15 imm. 1 naapertorlugu naatsorsuutit tunngavigalugit Naalakkersuisut nalilersinnaavaat tamakkiisumik ilaannakuusumilluunniit isumakkeerinninissamut tunngavissaqartoqarnersoq.

 

Aalajangersakkanut ataasiakkaanut oqaaseqaatit

Aalisarnikkut ajornartoortoqartillugu § 15 imm. 1 naapertorlugu tamakkiisumik ilaannakuusumilluunniit isumakkeerinninissamut tunngavissaqartoqaraangat naatsorsuutitigut uppernarsaatissat pissarsiarineqarnissaat Naalakkersuisunit utaqqineqaraangat akitsuutip tamarmiusup taassumaluunniit ilaata akilinngikkallarneqarnissaa Naalakkersuisut akuersissutigisinnaagaat aalajangersakkakkut piginnaatitaaffilerneqarpoq. Inatsisartut inatsisaanni § 15 imm. 1 naapertorlugu pissutsit immikkut ittut atuuttillugit tamakkiisumik ilaannakuusumilluunniit akitsuutinut akiligassanut Naalakkersuisut isumakkeerinnissinnaapput.